Judul: Hadiah Ulang Tahun Untuk Nyak

Kategori: Cerpen Betawi

Penulis: Nunik Utami

Award: Juara Harapan II Lomba Menulis Cerpen Betawi Piala Firman Muntaco, Lembaga Kebudayaan Betawi, Agustus 2006)

Hari masih pagi ketika Mpok Kur nimbrung di warungnye Mpok Salmah. Biase deh, namenye juge ibu-ibu, saban pagi pasti nyang dicari adalah sayuran. Maka kagak heran kalo tiap pagi warung Mpok Salmah dikerubutin. Penuh banget. Sementara tangannye milih sayuran, mulut ibu-ibu ntu juge aktip ngomong. Apelagi kalo bukan saling ngebanggain anaknye masing-masing.

“Waaahh, si Entong mah dulu rajin banget sekolahnye. Makanye sekarang udeh jadi sarjana, udeh kerja, tiap bulan aye dibeliin emas ame die,” kate Mpok Siti nyang dandanannye mentereng banget. Kalung, gelang , cincin dan anting-anting emas semuanye nyantol kayak tukang emas jalan.

“Ih, sama dong. Aye juge tiap bulan dibeliin perabotan ame Dikun, anak pertama aye nyang dah sukses,” Mpok Juju kagak mau kalah. Emang semue tetangge juga tau kalo rumah Mpok Juju perabotannye bagus-bagus.

“Waelah, Mpok… Asal tau aje ye. Ni warung juge hasil keringetnye Mamat. Die mah baek banget ame orang tue. Pengertian. Aye ampe dibuatin ni warung katanye biar aye bisa wiraswaste. Hihihi… padahal aye kendiri kagak tau ape artinye wiraswaste,” kate Mpok Salmah sambil cekikikan.

“Yeee, wiraswaste ntu artinye kite bikin usahe kendiri, Mpok,” sahut Mpok Kur.

“Oh, begitu. Kalo Mpok Kur pegimane. Udeh dibeliin ape aje ame Fahri?” Tanye Mpok Salmah.

Mpok Kur kaget ditanye soal ntu. Die emang belon pernah dibeliin sesuatu ame anaknya. Lah pan Fahri, anak semate wayangnye ntu,  masing SMA. Belon punye penghasilan. Dengan wajah lesunye, Mpok Kur ngejawab :

“Yahh, anak aye pan masing SMA, Mpok. Boro-boro ngebeliin sesuatu buat aye. Lah uang jajan aje masing minta ame babenya saban hari,”

Semue nyang ade disitu mencibir. Yah, memang begitulah kehidupan mereka. Selalu aje saling pamer. Pengin terlihat paling bagus dimate tetangge. Membuat Mpok Kur ngerase dikucilin.

 

***

Mpok Kur sedih. Die selalu keingetan ame kate-kate ibu-ibu waktu diwarungnye Mpok Salmah kemaren pagi. Jujur aje, Mpok Kur juga kepengen punye anak nyang suka  ngasih sesuatu ke orang tue.

“Bang, abang ngerasa ade nyang aneh gak ame anak kite?” Kata Mpok Kur ke Bang Udin –suaminye- sewaktu Fahri udeh tidur.

“Aneh pegimane?”

“Ya ntu, Bang. Tetangge kite semuanye sering dibeliin sesuatu ame anaknye. Perabotan rumah, perhiasan. Pokoknye nyang bagus-bagus deh. Kite kapan ye Bang?”

“Ya ampun, Kur. Mereka pan anaknye udeh gede-gede. Lah kite, cuman punye anak atu. Ntu juge baru SMA. Ntar Kur, kalo Fahri udeh kerja, baru deh kite ngarepin dikasih sesuatu,”

Mpok Kur manggut-manggut. Tapi jujur aje, dalem atinye pengeeen banget dikasih sesuatu ame Fahri. Apelagi bentar lagi Mpok Kur ulang taun. Boro-boro beliin hadiah, inget Nyaknye ulang taun aje belon tentu.

 

***

 

Tengah ari bolong begini biasenye Fahri udeh nyampe rumeh. Tapi kali ini die masing ade di halaman sekolahnye bareng Dulah.

“Jadi lo masing bingung Ri? Udeh, kasih aje ape nyang lu sanggup beliin,” Dulah angkat bicara. Sedari tadi rupanye mereka berdua lagi ngebahas tentang kado ulang taun untuk Mpok Kur alias Nyaknye Fahri. Wahhh, ternyate Fahri inget juge tanggal ulang taun Nyak tersayang. Kalo Mpok Kur tau, pasti die bangga banget.

“Wah, justru ntu, Dul. Gue kagak sanggup ngebeliin ape-ape. Lah punya duit aje kagak. Lu pan tau kendiri, uang bayaran gue bulan ni ame bulan kemaren masih nunggak. Gimane mau beliin kado buat Nyak coba,” pandangan Fahri menerawang jauh. Mukanye kentara banget lagi sedih.

“Kalo gitu kagak usah ngasih kado dulu, deh. Pasti Nyak lu paham. Pan die juge tau kalo lu masih nunggak bayaran?”

“Kagak bise gitu, Dul. Gue sedih denger dari Mpok Salmah katenye Nyak kepengen banget kayak orang-orang nyang anaknye suka ngasih sesuatu,”

“Ohhh, begitu. Jadi karena ntu lu jadi pengen ngasih kado buat Nyak lu?”

“Iye, Dul. Gue pengeeen banget bise ngasih sesuatu buat Nyak. Walaupun kagak bagus-bagus banget. Gue pengen bikin Nyak seneng, Dul,”

“Yaahh, abis pegimane lagi, Ri. Lo kendiri pan belon mampu nyari duit? Masa mau lo paksain?”

Fahri tambah lesu ngedenger kate-kate sobatnye ntu. Tapi die tetep berpikir keras, nyari cara gimane biar bise ngasih hadiah buat nyaknye.

 

***

Udeh tiga ari Fahri kagak masup sekolah. Kagak ade kabarnye. Dulah, temen deket Fahri juge kagak tau kenape Fahri kagak masup. Padahal kagak sari-sarinye Fahri begini. Dulah memutuskan untuk dateng ke rumahnye Fahri. Die pengen banget tau kenape sobatnye itu tumben-tumbenan kagak masup sekolah ampe berhari-hari. Padahal biasenye tuh anak rajin banget.

“Ehhh, Dulah… Ade ape? Kok tumben udah lama baru kemari lagi?” Mpok Kur dateng menyambut ketika Dulah sampe dirumah Fahri.

“Iye, Nyak. Aye pengen ketemu Fahri nih, Nyak. Udeh tiga ari kagak masup sekolah, ape sakit ye?” Dulah langsung ngebeberin alesannye dateng ke situ.

“Haaaaa?? Fahri kagak masup???” kagak diduge, Mpok Kur malah melotot kaget denger berita nyang dibawa Dulah. “Buset dah!!! Fahri saban pagi berangkat kok…Ape kagak nyampe ke sekolaan kali ye?”

“Ohhh, jadi tiap ari Fahri berangkat ye Nyak?” Dulah juge kaget bukan kepalang.

“Iye. Pan tiap ari Nyak nyang nganter ampe pintu. Udeh rapi pake pakean sekolah,” Mpok Kur garuk-garuk kepala saking bingungnye. “Waahh, kayaknye tuh anak udeh mulain badung, ye. Awas kalo nanti die pulang. Gue bejek-bejek sekalian!,” Mpok Kur berkacak pinggang. Die keliatannye udeh mulai marah.

“Eh, Nyak. Sabar dulu, Nyak,” Dulah berusahe nenangin Mpok Kur.

“Sabar pegimane?!!! Fahri pan udeh tau bayaran sekolah mahalnye kagak ketulungan! Ngape die bise-bisenye bolos??!! Dikate orang tuenye bandar duit???”

Rupanye Mpok Kur marah besar.  Die kagak terime anaknye jadi begajulan gitu.

“Ntar kalo Fahri pulang, awas, ye,” Mpok Kur mengacungkan tinjunye ke udara.

“Nyak…tenang dulu Nyak. Aye kan Cuma…,”

“Alah! Udeh diem lu!”

 

***

Malem arinye, Fahri disidang. Babe dan Nyaknye marah besar

“Coba bilang ke Nyak, ngapa lu pake kagak masup sekolah?” Mpok Kur berkacak pinggang tepat didepan Fahri nyang lagi nunduk ketakutan. Ngeliat Fahri diem aje, Mpok Kur tambah kesel. “Jawab! Jangan nunduk aje, lu! Emangnye lu kate sekolah murah? Nyak ame Babe bela-belain nyari duit ampe jungkir balik, buat ape coba kalo bukan buat lu??”

Nyak bener-bener marah. Fahri makin kagak berani ngangkat mukenye. Sementara Babenye cuman duduk dipojokan. Die juge bingung mau ngomong ape, soalnye bininye udeh sedemikian marahnye.

“Maap, Nyak,” akhirnye Fahri berani ngomong. “Aye.. pergi ke rumahnye Sadeli. Aye… aye..,”

“Aye ape??!!” Mpok Kur kagak sabaran. Sebelah tangannye ampir melayang ke muke Fahri.

“KUR!!” untung Bang Udin cepet nangkep tangan Mpok Kur. “Ame anak jangan terlalu kasar, Kur. Inget Kur, die cuman anak kite satu-satunye. Ntar kalo die kenape-nape kite nyang nyesel,”

Mpok Kur nangis denger kate-kate suaminye. Die bener-bener khilaf saking keselnye. Die lupe kalo Fahri cuman satu-satunye anak nyang mereka punya. Sementara ntu Fahri cepet lari ke kamar. Menyendiri.

 

***

Ini hari Minggu. Mpok Kur duduk di bangku kayu dirumahnye. Suaminye udah berangkat ke bengkel tempatnye kerja. Udeh ampir seminggu Mpok Kur kagak negor Fahri. Rupanye die masing marah ame anaknye itu. Sekali-sekali die mo ngasih pelajaran biar Fahri kagak terus-terusan badung. Biar tau gimane susahnye orang tue nyari duit buat ngempanin ame biayain sekolah. Harusnye Fahri bisa ngerti. Orang tuenye pan bukan orang berduit. Orang melarat. Pake kagak masup sekolah segale. Untung aje cuman tiga ari Fahri bolos. Coba kalo lebih lama lagi, percuma dah dibayarin sekolah. Mending berenti aje sekalian.

Hari Minggu begini biasenye Fahri bangun agak siang. Tapi ni ari beda banget. Fahri udeh mandi, udeh rapi dan wangi. Mpok Kur kaget juge liat anaknye beda. Tapi die cuek aje, kagak mau negor. Fahri menghampirin Mpok Kur sambil bawa sebuah bungkusan cantik.

“Nyak…” katenye sambil duduk disamping Nyaknye. “Nyak lupe ye? Hari ‘ni pan Nyak ulang taun,” Fahri tersenyum.

Mpok Kur kaget banget. Die menoleh ke arah anak semate wayangnye. Ulang taun?

“Ni ade kado buat Nyak. Sekalian…aye mo minta maap ye, Nyak,”

Mpok Kur masing diem. Die baru inget kalo ni ari ulang taunnye. Mpok Kur lebih kaget lagi waktu Fahri ngasih kado ntu. Tapi dalem atinye sangat terharu. Udeh lama die pengen dikasih sesuatu ame anaknye kayak tetangge-tetangge. Dan kali ni keinginannye terkabul. Udeh gitu pas banget di hari ulang taunnye, nyang die pikir bahwa Fahri kagak mungkin inget. Ehh, gak taunyeee…die kendiri nyang lupe.

“Ya ampuunn, anak Nyaaakk,” akhirnye Mpok Kur bersuare juge. Aer mate berhamburan dipipinye. Die langsung memeluk Fahri.

“Nyak…aye kagak masup sekolah tiga ari, karena aye berusahe cari uang buat beli kado untuk Nyak…” Fahri berkate pelan.

“Ape? Nyari uang? Nyari uang dimane? Lu kagak nyolong pan???” Mpok Kur ngerasa panik.

“Kagak lah, Nyaakk. Masa aye  nyolong?”

“Lah ni duit dari mane kalo gitu?”

“Selame tiga ari ntu, dari pagi ampe siang aye bantuin Nyaknye Sadeli masang-masangin kancing. Nyaknye Sadeli pan tukang jait tuh. Terus siangnye aye bantuin Babenye Sadeli di bengkel miliknye ampe sore. Jadi aye terpaksa kagak sekolah, Nyak. Aye pengen banget punya duit buat beli ni, Nyak,” Fahri ngangsurin bungkus kado ntu ke pangkuan Mpok Kur.

“Ya ampuunnn, Fahriii…Nyak bener-bener salah sangke ye? Maapin Nyak yee,” Mpok Kur memeluk anaknye lagi.

“Nyak..kadonye dibuka dong,” pinta Fahri.

“Iye, iye Tong!” Mpok Kur buru-buru ngerobek bungkus kado ntu. Dan aer matenye berlinang lagi ngeliat kebaya indah pemberian Fahri.

“Ri…ma kasih ye… Lu udeh susah payah nyari duit ampe kagak sekolah buat beliin Nyak kebaya ni..”

“Iye, Nyak. Nyak suka kebaya ntu pan?”

“Iye, suka banget. Bagus. Lu pinter amat milihnye? Hehehe…”

Wajah Mpok Kur udeh kembali ceria. Die bahagia banget anaknye ternyate ngasih perhatian nyang besar. Die sama sekali kagak nyangke. Die akan bilang ke para tetangge bahwa anaknye juga bise ngasih sesuatu nyang menurutnye sangat berharge. Mpok Kur sadar. Bukan besar ato kecilnye hadiah, tapi besarnye perhatian dan kasih sayanglah nyang bikin Mpok Kur ngerasa bangga.

Sepanjang hari ntu, Mpok Kur gelisah, kagak sabaran nunggu suaminye pulang. Die pengen banget nyeritain kebahagiaan nyang dialami tepat dihari ulang taunnye.

 

                              TAMAT